Mirë se erdhët në Qendrën e Transfuzionit të Gjakut

HOME INFORMATA PLANI AKTIVITETE ANKETA PACIENTET FLASIN LAJME & NGJARJE PERSONELI FOTOGRAFI LINKAT

- Dhurimi vullnetar i gjakut dhe situata e krijuar pas disa shkrimeve qëllimkëqija në gazetën “express”

Prishtinë, 27 maj 2005

Qendra Kombëtare e Kosovës për Transfuzionin e gjakut, aktivitetin e vet kryesor e konsiston në grumbullimin e sasive të mjaftuara të gjakut nga njerëzit e shëndoshë, për shërimin e atyre pacientëve që kanë nevojë për gjak dhe produkte të gjakut. Për të arrituarat e qendrës sonë besoj se është i njoftuar mjaft opinioni kosovar, ngase ne çdo ditë vizitojmë mese të ndryshme në Kosovë e njëherit mundohemi të jemi aktiv edhe në media, prandaj nuk do të kisha folur më tutje për këtë momenalisht. Qëllimi i këtij shkrimi është demanti për disa shkrime të këtyre ditëve në një gazetë të re të përditshme në Kosovë “express”, të shkruar nga një grup të ashtuquajturish “gazetarë” që udhëhiqen nga i ashtuquajturi kryeredaktor Dukagjin Gorani. Në këtë gazetë, autorët e lartëpërmendur shkruajn se si Qendra Kombëtare e Kosovës për Transfuzionin e Gjakut shet gjakun e dhuruesve vullnetarë klinikave private.

Në emër të Qendrës Kombëtare të Kosovës për Transfuzionin e Gjakut e demantojmë këtë shkrim forcërisht dhe jemi shumë të indinjuar për një shkrim të tillë pa përgjegjësi dhe shumë të pamoralshëm.

Ne deri më sot, kurrë nuk ia kemi lënë as rastit që të ndodhë ndonjë gjë e tillë, ngase kjo do të prekte ndërgjegjen e çdo njërit, e sidomos të anëtarëve të stafit tonë, për çka mund të mburremi dhe për çka kemi arritur këtu ku jemi, me angazhimin maksimal të të gjithë neve. Si duket kjo e arritur i ka penguar dikujt, e si duket sidomos u ka penguar stafit të gazetës në fjalë. A mund të thuhet ndryshe kur një institucion me një përgjegjësi dhe ndjeshmëri shumë të lartë kombëtare etiketohet me etiketime nga më të ndryshmet. Mund të veqohen: “mafia e kuqe”,”biznesi i gjakut”, “tregtarët e gjakut”, “gjakshitësit”, ”dhuruesit anonim”, etj., pastaj pa ndonjë hezitim perdorimin e emrit të TMK-së për të keqinterpretuar humanitetin e tyre, etj. Kjo gjë në vendet tjera do të sanksionohej me ligje shumë të ashpra, e besojmë se kjo do të ndodhë shumë shpejt edhe këtu në Kosovë. Këto etiketime ndoshta nuk do të bëheshin as nga armiqtë tanë të përbetuar.

Çdo fjalë e thënë gabimisht për gjakun dhe transfuzionin, në opinion merr konotacion shumë negativ, ulë nivelin dhe moralin e dhuruesve të gjakut, e në këtë rast pësojnë pacientët që presin një pikë gjaku për t’iu shpëtuar jeta, prandaj me këtë shkrim dezinformues Qendra jonë ka marrë një grusht të fortë pa të drejtë.

Themi pa të drejtë ngase, pas këtyre shkrimeve tendecioze, qëllimkëqija, jomorale dhe idioteske, me apo pa arsye ranë në kurth edhe disa nga zyrtarët e lartë në Ministrinë e Shëndetësisë dhe u turrën në Transfuzion për të hulumtuar, por nuk lanë anash as përgojimet se po bëhen vepra kriminale, ilegale etj., e pas një kontrolli të detajizuar disaditësh u kthyen në zyret e tyre kokëulur, pa gjetur as edhe vetëm një keqpërdorim të gjakut të dhuruesve vullnetarë nga Qendra Kombëtare e Kosovës për Transfuzionin e Gjakut. Në gazetën në fjalë u shkruajt se guarda di Financa ka bërë hulumtime në këtë rast, por sikur edhe të gjitha shpifjet tjera edhe kjo ishte shpifje dhe trillim i njerëzve të mbushur me urrejtje ndaj atyre që mundohen të punojnë për të mirën e popullit.

Sa i përket asaj se a shet QKKTGJ gjak klinikave private apo jo, do ta jepja këtë sqarim paksa më të detajuar: Kurrsesi JO. QKKTGJ ka disa kontrata me disa klinika private, me të cilat i ka të definuara të gjitha qështjet sa i përket gjakut. Nëse dikush për arsyet e veta personale shkon të operohet në klinikë private, për të cilin operacion nevojitet gjak (klinikat private shumë rrallë bëjnë operacione ku u nevojitet gjak, për mungesë të mjeteve, stafit të mjaftueshëm etj.), atëherë obligohen të sjellin dhuruesin (apo dhuruesit) e gjakut, të cilin gjak në QKKTGJ e marrim, e testojmë, e përpunojmë dhe e përgatisim për tia dhënë pacientit, dhe pastaj atë gjak ia japim pacientit me vete dhe ai shkon e operohet atje ku dëshiron ai, pra klinika private e merr gjakun e familjarëve të pacientit të tij dhe natyrisht se kjo është e drejtë e pamohueshme. Për këtë shërbim ndaj klinikës private (kesja e gjakut, percaktimi i grupit të gjakut dhe Rh faktorit, testimi për sëmundje infektive, inter-reaksioni dhe të tjera), meqenëse të gjitha këto janë shpenzime, atëherë klinika private duhet ti paguajë shpenzimet dhe kjo është e tëra. Po të mos paguheshin këto shpenzime, Ministria e Shëndetësisë do të kërkonte se ku janë materialet e shpenzuara të cilat I ka blerë për Transfuzionin e Gjakut. Pra gjaku i dhuruesve vullnetarë nuk bëhet fjalë të keqpërdoret nga dikush, e për këtë mund të bindet secili, ngase ekzistojnë shënimet e sakta për çdo njësi të gjakut të dhuruar në Kosovë që nga viti 1999 e tutje dhe kur të dojë, kush të doj munda ta shef se ku ka shkuar gjaku i dhuruar.

Me keqardhje më duhet të them se gazeta në fjalë dhe autorët e shkrimit, për një dezinformatë të tillë të opinionit dhe një nënçmim të tillë për Qendrën tonë do të duhej të paditen në GJYQ dhe në të gjitha instancat më të larta mediale e fajtorët duhet ti bartin konsekuencat. Kjo sepse, nëse tash e tutje një pacient vdes për mungesë të gjakut, këta janë njerëzit fajtorë për krijimin e kësaj situatë e jo Qendra Kombëtare e Kosovës për Transfuzionin e Gjakut, personeli i së cilës janë të zhgënjyer nga shkrimet e tilla dhe shumë të mllefosur, por të pathyeshëm në detyrat që duhet ti kryejnë edhe në vazhdim. QKKTGJ me një mund të jashtëzakonshëm, është ngritur dhe është zhvilluar, e kjo ka rezultuar edhe me pranimin në Federatën Botërore të Organizatave të Dhurueve të Gjakut, qysh në vitin e kaluar me flamurin tonë kombëtarë, si anëtarë me të drejta të barabarta me shtetet tjera të botës (shiko: www.fiods.org, dhe www.transfuzioni.com) .

Ne do të vazhdojmë tiu shpjegojmë njerëzve edhe më tutje, se dhurimi i gjakut ia shpëton jetën dikujt dhe se gjaku i dhuruar shkon në mënyrë të sigurtë deri te pacienti. Ai që vazhdon të pengojë këtë gjë, është njeri jo i mirë për shoqërinë e dëmet e tij janë baraz me vdekjen e ndonjë pacienti.

DHURIMI I GJAKUT SHPËTON JETË.

DHURUESI I GJAKUT ËSHTË NJERI I MADH ME VLERA TË LARTA NJERËZORE.

Skender Abazi

Menaxher për marketing dhe informim

Qendra Kombëtare e Kosovës për

Transfuzionin e Gjakut – Prishtinë

Tel. 038 542 839

Mob. 044 152 928

Email: transfuzioni@hotmail.com