Prishtinë, 17 shkurt (Kosovapress)

Sipas zyrtarëve të Qendrës së Transfuzionit të gjakut, gjatë katër ditëve të aksionit për dhurimin vullnetar të gjakut janë grumbulluar 60 doza të gjakut, që sipas tyre kjo sasi nuk është e vogël duke pasur parasysh se gjatë një muaji në lokalet e transfuzionit të gjakut në Prishtinë nuk është një numër i tillë i dhuruesve vullnetarë të gjakut.

Skënder Abazi, menaxher për marketing dhe informim në Qendrën Kombëtare të Kosovës për Transfuzionin e Gjakut, shpreson se në qoftë se edhe një pikë gjaku e dhuruar vullnetarisht nga një njeri, do ta shpëtojë një jetë njeriu.

"Qendra për Transfuzionin e gjakut në bashkëpunim me TMK-në, nisën të zhvillojnë një aktivitet që nuk kishte ndodhur më parë. I bashkuam forcat dhe vendosëm që pa marrë parasysh të ftohtit, ky aktivitet të fillojë pikërisht në datën 14 shkurt, njëherit kjo do të tregonte se të ftohtit nuk është pengesë për dhurimin e gjakut", tha ai.

Ai shtoi se parashikimet e këtij aksioni ishin që së paku 10-12 njerëz gjatë ditës do të ofrojnë gjakun e tyre për ta dhuruar, por ndodhi që ky numrë të jetë më i madh, sepse asnjë ditë nuk ka pasur nën 15 dhurues vullnetarë të gjakut.

"Ky aktivitet hasi në mirëpritje nga qytetarët. Rol shumë më rëndësi në këtë drejtim kanë dhënë edhe mediat kosovare, pa ndihmën e të cilave suksesi do të ishte shumë i zvogëluar", tha Abazi.

Megjithatë, ai shpreson se edhe ditëve të ardhshme do të kemi sukses edhe më të madh në këtë drejtim.

"Prej 21-24 shkurt ekipi mobil i Transfuzionit të Gjakut do të qëndrojë pranë Pallatit të Sporteve në Prishtine e pastaj do të vazhdojë edhe në vende tjera duke përfshirë të gjitha qytetet e Kosovës", tha Abazi, duke shtuar se aktiviteti për dhurimin e gjakut vullnetar do të zhvillohet deri në mesin e muajit maj të këtij viti.