Prishtinë, 16 shkurt 2005 (KosovaLive)

Qendra Kombëtare e Kosovës për Transfuzionin e Gjakut (QKKTGJ), të mërkurën, në ditën e dytë të aksionit për dhurimin vullnetar të gjakut, ka tubuar 38 doza të gjakut.

Skender Abazi, zyrtar për informim i QKKTGJ-së, tha për KosovaLive, se ditën e parë kanë tubuar 15 doza të gjakut duke përfshirë edhe personelin e Qendrës..., ndërsa në ditën e dytë, nga qytetarët vullnetarë janë dhuruar 23 sosh. "Qëllimi ynë është që çdo ditë të tubojmë nga 20 doza të gjakut, edhepse ditën e parë nuk ja kemi arritur, ndoshta në munges të informimit të qytetarëve, ditën e dytë e kemi kaluar me 23 doza", tha ai.

Arsim Shala, punëtor i Kuvendit të Kosovës, të mërkurën ishte njëri nga dhuruesit vullnetarë të gjakut. "Kam ardhur të shpetojë jetë dhe i ftoj të gjithë qytetarët ta bëjnë të njëjtën gjë, sepse nuk ka asnjë lloj rreziku", tha ai.

Dy ditë më parë, para Teatrit Kombëtar në Prishtinë, kanë dalur përsoneli i Qendrës Kombëtare për Transfuzionin e Gjakut me qëllim të informimit të qytetarëve lidhur me mënyrën e dhënies vullnetare të gjakut.

Nga Trupat Mbrojtëse të Kosovës (TMK) atyre u është huazuar një kamion që do t'ua lehtësojë punën.

Gjatë kësaj jave qytetarët kanë mundësi që të dhurojnë gjak, te njësia e vendosur para Teatrit Kombëtar, ndërsa nga 21 deri 24 shkurt ekipi do të vendoset para Pallatit të Sporteve, për të vazhduar më pas nëpër disa pika tjera nëpër Prishtinë.

Sipas zyrtarëve të kësaj qendre, dhurimi i gjakut shpëton jetërat e pacientëve. Ata thonë se dhënia vullnetare e gjakut ndikon që jeta e dikujt të shpëtohet. Kërkesat për gjak, sipas zyrtarëve të QKKTGJ-së, po rriten për çdo vit si rezultat i operacioneve të shumta që po bëhen në spitalet tona si dhe përparimeve të shumta në trajtimin e pacientëve. Shumë prej këtyre operacioneve varen nga mbështetja e rregullt dhe e sigurtë me gjak.

Dhurimi i gjakut është mjaft i shpejtë dhe nuk kushton asgjë për shëndetin e dhuruesit. Rreth 250-450 ml mund të dhurohen brenda 5-10 minuta. Gjaku mblidhet në qese të posaçme plastike, për sigurinë e qytetarëve dhe i tërë materiali dhe mjetet që përdoren janë komplet sterile dhe vetëm për një përdorim. Zyrtarë të qendrës janë optimistë se ky aktivitet do të ketë sukses. (t.hykolli)