Prishtinë, 14 shkurt (Kosovapress)

Me moton "Dhurimi i gjakut-shpëton një jetë njeriu", organizuar nga Qendra Kombëtare e Kosovës për Transfuzion të Gjakut, të hënën në Prishtinë ka filluar aksioni i dhurimit vullnetar të gjakut që ka për qëllim dhurimin vullnetar të gjakut të të gjithë atyre që dëshirojnë ta bëjnë këtë.

Skënder Abazi, menaxher për marketing dhe informim në Qendrën Kombëtare të Kosovës për Transfuzionin e Gjakut, tha për Kosovapress, se në ditën e parë të këtij aksioni interesimi i dhuruesve vullnetarë të gjakut ka qenë solid.

"Në ditën e parë vetëm 15 qytetarë të kryeqytetit kanë dhuruar gjak vullnetarisht edhe pse sipas parashikimeve tona kemi pritur se ky numër do të jetë rreth 20", tha ai duke shpresuar se ditëve në vijim ky numër do të rritet.

Sipas tij për qytetarët e Prishtinës orari i dhurimit vullnetar të gjakut do të jetë: 14-17 shkurt pranë Teatrit Kombëtar, 21-24 shkurt pranë Pallatit të sporteve, 28 shkurt - 1 mars pranë Bibliotekës Kombëtare, 2-3 mars pranë hotelit "Grand", duke filluar prej orës 10.00-15.00.

Në anën tjetër, qytetarët të cilët kanë dhuruar gjak vullnetarishtë, apeluan te qytetarët që të mos hezitojnë dhe të dhurojnë gjak.

Enver Gashi, qytetar nga Prishtina, tha se kjo nuk është hera e parë që ai dhuron vullnetarisht gjak.

"Unë disa herë kam dhuruar në mënyrë vullnetare gjak dhe do të vazhdoj që të dhuroj përsëri, por apeloj te të gjithë qytetarët tanë, të cilët janë në gjendje të mirë shëndetësore të na bashkangjiten në këtë aksion," tha ai.

Ndryshe, edhe qytetarët tjerë të kryeqytetit, të cilët dhuruan gjak vullnetarisht dhe se numri i tyre ishte jo i madh, thanë se të gjithë ata njerëz që kanë mundësi të dhurojnë gjak në mënyrë vullnetare t'i përgjigjen këtij aksioni.