Prishtinë, 14 shkurt 2005 (KosovaLive)

Qendra Kombëtare e Kosovës për Transfuzionin e Gjakut (QKKTGJ), të hënën filloi një aktivitet të ri për t'iu mundësuar qytetarëve të dhurojnë gjak vullnetarisht.

Skender Abazi, zyrtar për informim i QKKTGJ-së, tha për KosovaLive, se para Teatrit Kombëtar në Prishtinë, kanë dalur përsoneli i qendrës me qëllim të informimit të qytetarëve lidhur me mënyrën e dhënies vullnetare të gjakut.

Sipas tij, aktualisht janë duke u pritur përgatitjet teknike që të fillohet me këtë aktivitet, ndërsa nga Trupat Mbrojtëse të Kosovës (TMK) është huazuar një kamion që do t'ua lehtësojë punën.

Gjatë kësaj jave qytetarët kanë mundësi që të dhurojnë gjak, te njësia e vendosur para Teatrit Kombëtar, ndërsa nga 21-24 shkurt ekipi do të vendoset para Pallatit të Sporteve, për të vazhduar më pas nëpër disa pika tjera nëpër Prishtinë.

Sipas zyrtarëve të kësaj qendre, dhurimi i gjakut shpëton jetërat e pacientëve. Ata thonë se dhënia vullnetare e gjakut ndikon që jeta e dikujt të shpëtohet.

Kërkesat për gjak, sipas zyrtarëve të QKKTGJ-së, po rriten për çdo vit si rezultat i operacioneve të shumta që po bëhen në spitalet tona si dhe përparimeve të shumta në trajtimin e pacientëve. Shumë prej këtyre operacioneve varen nga mbështetja e rregullt dhe e sigurtë me gjak.

Dhurimi i gjakut është mjaft i shpejtë dhe nuk kushton asgjë për shëndetin e dhuruesit. Rreth 250-450 ml mbledhet mund të dhurohen brenda 5-10 minuta. Gjaku mblidhet në qese të posaçme plastike, për sigurinë e qytetarëve dhe i tërë materiali dhe mjetet që përdoren janë komplet sterile dhe vetëm për një përdorim.

Zyrtarë të qendrës janë optimistë se ky aktivitet do të ketë sukses. (teuta hykolli)